Foto:

Column: Clown Henkie

Elf medaillies lingt d’r vuur miej op toafel. Ik heb ze ammoal bewoard. Toch is ’t al wier nen zet eleden dat ik metdee an de zwemveerdaagse. ’t Is der nit mear van ekömmen. Kieken of ik ’t wier op kan pakken.

De zwemveerdaagse is aaltied in ‘t zommer. In miene herinnering is ‘t aaltied koold. In ieder geval te koold vuur ’t boetenbad. Schient good te wean vuur de bloedsumloop, det koolde water.

Met zin veern, mien va, de beaide zusters en ikke, zwömme viej tien baantjes, ook al hoown viej der eerst nog mer viewe. ’t Was der in en der oet, aansumme antrekken en wier noar ‘t hoes. Kachel in ’n auto an. Roeten kets besloan. Mer op ’n lesten oawnd dan atte viej ne oliebol en nen sukerspin en aln deksel mear tot da’w misselijk warren. Keke viej de hele wekke noar oet.

Der was ook zonnen clown vuur de wichter. Den maakn dan nen hoond of ne blome of ’n zweard van ballonnen. Doar steun zo völle wichter umhen, det dee wichter alwier noar ‘t hoes hen monnen van de va en moo vuurdet ze an de buurte warren. En mer ropen: “Henkie! Henkie!!” Iej zoln toch deanken det clown Henkie de meuiste bane van de wearld hef: wichter bliej maken met ballonfiguren.

Mer dissen Henkie hef of ’n heel lellijk wief of grote scheulden of gewoon nen hekel an wichter of ne combinatie van alns, want hee dee onmeunig strottig tegen de wichter. “Even wachten, nu gaat clown Henkie koffie drinken. Niet zo zeuren, clown Henkie moet even een sigaretje roken. Nu even niet, ik moet pissen.” Op ’t genante of. Mien zuster steun al ’n kwarteer in de drukkende en trekkende wichtermassa vuur nen hoond van ballonnen, mer clown Henkie zag niks. Viej keken meewoarig too en oeteindelijk mos’e zoonder ballon wier met oons met noar ‘t hoes. Hee was ontreustboar.

‘Clown Henkie’ is biej oons een typetje ewörden van ene den mooi woark hef, mer der nit van geniet. Iederene keant vaste ook wal zonnen clown Henkie. Ik zol willen zegn teegn disse leu: “Zeukt astebleef ne bane in ’n magazien of zo en vaalt aandern nit lastig met oew persoonlijkheaid.”

Marieke Dannenberg

Meer berichten
 
Auto zoeker